مزگەوت ! مەگەر ئەوانی تر چیان بەرهەم هێناوە؟

وتار/ 28/07/2018 616 جار بینراوە

کەمال ئەسکەندەر

مزگەوت !  مەگەر  ئەوانی تر چیان بەرهەم هێناوە؟
نوسینی : کەمال ئەسکەندەر

سیاتکردن بەسیاسەتی پاوانخوازی لەهەرێمی کوردستان دۆخێکی قێزەونی ئەوتۆی بەدیهێناوە بەجۆرێک لەگەڵ هەر پێشهاتێکی نەخوازراو هەموو شتێک دەرفەتی لێوەردەگیرێ تەنانەت پیرۆزیەکان و ئاین و مزگەوتیش تێوەدەگلێندرێ .

لەم باسەدا نامەوێ بچمە سەر پێناسەو سودەکانی مزگەوت ، چونکە بەرهەمی مزگەوت لەڕابردوو و لەئێستاشدا بەڕوونی دیارە ، ئەوەی لای هەمووان زانراوە مزگەوت یەکێکە لەو ناوەندانەی کە خەڵک تیایدا کۆدەبێتەوە ، دەی ئێمە زۆر شوێن و ناوەندی ترمان هەن کە خەڵک تیایدا کۆدەبێتەوە ، ئەی ئەوان چی ؟

مەگەر شاخ وشۆڕش کێی بۆ بەرهەم هێناین ؟ جگە لەدەسەڵاتێکی گەندەڵ لە دوای ڕژانی دەریایەک لەخوێنی شەهیدان و جەرگ سوتانی هەزاران دایک .

مەگەر حزب و بارەگا حزبیەکان چیان پێشکەش بەکۆمەڵگە کرد ؟ جگە لە مونافەسەیەکی ناشەریفانە و تێکدانی پەیوەندیە کۆمەڵایەتیەکان، بەجۆرێک کامەی خوێندەوارە کاتێ توشی دەردی حزبایەتی دەکەن لەلوتکەی نەخوێندەواری مامەڵە لەگەڵ کۆمەڵگە دەکات .

مەگەر ئێوە  لەپشتی دروشمە بریقەدارەکانتان و دروست کردنی چەندین حزب و ڕێکخراو و ناوەند لەبابەت و بوارەکانی وەک ( ماف وئازادی ، دیموکراتی ، مەدەنیەت ، هەڵبژاردن ، یەکسانی ، مافی ئافرەت ، خۆشگوزەرانی خەڵک ....... ) چیتان پێشکەش بەمیللەت کرد ؟ جگە لەگیرفان پڕکردنی کەمێکی دڵسۆز بەحزب .

مەگەر ئێوە بەهێنانی کلتوری ڕۆژئاوایی و فیکرو بەرنامە فاشیلەکانی بێگانە چیتان بۆ میللەت کرد ؟ جگەلە خۆدەوڵەمەندکردن و کاڵکردنەوەی ئینتمای نەتەوەیی و بەدەرنانی گەنجان بۆ هەندەران کەزۆرێکیان بەکۆمەڵێک داخ و هیواو ئومێد لە دەریادا خنکان .

مەگەر لەسایەی سەری ئێوە حکومەت و پەرلەمان و هەڵبژاردن و دادگاکان لەکوێی متمانەو خزمەتی هاووڵاتیان دان ؟ ئەی ئەوە نیە گەورەو بچوک لەو پەڕی نائومێدی و بێزاری و بێ موچەیی ژیان تێدەپەڕێنن !

دواجار مەگەرەکان زۆر زۆرن لەسەرتان بکەین بەنمونەی فەشەلی حکومڕانیتان ، ئیتر لەمزگەوت و پیرۆزیەکان دوورکەونەوە .

نوێترین نوسینەکانی کەمال ئەسکەندەر