کورد! قوربانی بەرژەوەندی ووڵاتان

وتار/ 23/01/2018 526 جار بینراوە

کەمال ئەسکەندەر

کورد! قوربانی بەرژەوەندی ووڵاتان
كه‌مال ئه‌شكه‌نده‌ر
خەم وئەسەف ڕاماندەچڵەکێنی کاتێک لەمێژوو دەڕوانین ، ئێمەی کورد خاوەنی دەریایەک لەخوێن و قورباندانین بۆ دەستەبەرکردنی بەرژەوەندی ووڵاتان .

ئەوەی جێگەی تێڕامانە ئەوەیە ، هەر لە کۆنەوە تادەگاتە سەردەمی عوسمانی و سەفەوی بگرە تا دوای ڕێککەوتننامە شومەکەی سایکس بیکۆ و ئێستاشی لەگەڵ دابێ هیچ کات کورد یەکگرتوو نەبوە بۆ بەدەست هێنانی مافە بنەڕەتییەکانی ، بەڵکو هەردەم دابەش بووەتە سەر هێزو ووڵاتان بەجیاوازی فکرو ئایدیا و گیرفانی بڕیار بەدەستانی کورد ، لەکاتێک دا ئەوان کورد بەپارسەنگی بەرژەوەندیەکانیشیان قەبوڵ ناکەن ، دووبەش بونی میرنشینە کوردیەکانی ئەوسا و حزبە سیاسی یە دەسەڵاتدارەکانی چوارپارچەکراوەکەی کوردسان لەئێستادابەنمونە.

لەشکرکێشی تورکیا بۆ سەر عەفرین لەرۆژئاوای کوردستان جگە لە ڕشتنی ڕقی زاڵمیەتی تورکیا بەسەر کوردان لەشەهید و بریندارکردنی دایکان و پیاوانی بەساڵاچوو و منداڵانی شیرەخۆر کە خاوەنی خاکێکی بێ سنور و بێ بەش لە کەمترین مافەکانی ژیانن هیچ لێکدانەوەیەکی تر هەڵناگرێ ، جگە لە زوڵمی تورکیا دوور لەهەموو بەهایەکی ڕێزگرتن لە واتای مرۆڤ بون ، بەڵکو شەڕی پێفرۆشتنێکە بۆ فراوانکردنی سنوری بەرژەوەندیەکان بەچاوپۆشی ڕوسیا و ئەمریکا.

ئەوەی جێگەی مەترسیە ئەوەیە هەرکاتێک زلهێزان و ووڵاتانی دراوسێ ناوچەکە دەکەن بەسفرەی دابەشکردنی بەرژەوەندیەکانیان کورد دەکرێت بەسەری ڕمەکەو سەنگەرەکانی پێشەوەی پێ ئاوەدان دەکرێتەوە ، دواتریش بە ژێرپێ خستن و پشت تێکردنی کورد سفرەکە هەڵدەگیرێتەوە .

لەبیرتانە ووڵاتانی زلهێز و تورکیای دراوسێ بۆ شەڕی دژی داعش چۆن لەم سەر بۆ ئەو سەر کوردستانی باشور و کوردستانی ڕۆژئاوایان کردبوو بەیەک سەنگەر ،بەجۆرێک پێشمەرگەو شەڕڤان ئاوێتەی یەکتر دەکران و سنور بەڕووی پێشمەرگە لەتورکیاوە بۆ کۆبانی واڵادەکرا و بەردەوام باس لەقارەمانیەتی پێشمەرگە لەبەردەم کەناڵەکانی ڕاگەیاندن دەوترایەوە ، ئەی ئەوەی ئێستا دەگوزەرێ چی ؟

لەکۆتایی دا ئەوەی لەناوچەکە لەهەمبەر گەلی کورد دەکرێ سود بینینە لە دابەشبوونی میللەتەکەمان بەسەر حزب و فیکرو ئایدیا لەکاتێک دا هیچ کات دوژمنان جگە لەبەرژەوەندیە ئابوری یەکانیان لەسەر حسابی خاکی کوردستان وگەلی کورد بۆ هیچ مەبەستێکی تر سەنگەریان لێ نەگرتوین