سه‌مای سیاسه‌ت به‌ئاوازی بوده‌ڵه‌كان
وتار/
18/12/2017
646 جار بینراوە
کەمال ئەسکەندەر
سه‌مای سیاسه‌ت به‌ئاوازی بوده‌ڵه‌كان
نوسینی : کەمال ئەسکەندەر
كایه‌كانی ڕامیاری و قاڵبونه‌وه له‌سیاسه‌ت ئیتیك و به‌ها و قیه‌می خۆی هه‌یه ، بۆیه له‌جیهانی سیاسه‌ت دا ئه‌وانه‌ی سنوره‌كان ده‌به‌زێنن به‌مه‌به‌ستی مانه‌وه‌یان له‌كورسی ده‌سه‌ڵات و پله وپۆسته‌كان دا بۆ ئه‌وه‌ی ده‌سه‌ڵاته‌كانیان بكه‌ن به‌هاوشێوه‌ی كێوی قاف و ڕه‌گ وڕیشاڵیان بۆ چه‌ند نه‌وه‌یه‌ك له به‌هه‌ده‌ردانی سامانی گشتی له‌شوێنی خۆیان دابچه‌قێنن ، ئه‌و كاته هیچ به‌ها ونرخێك نامێنێت ته‌نانه‌ت ماف وئازادیه‌كان ده‌بن به‌سه‌رابی بیابان .
له‌هه‌رێمی كوردستان دا زۆرن ئه‌وانه‌ی سه‌مایه‌كی قێزه‌ون له سه‌ر شانۆی سیاسه‌ت ئه‌نجام ئه‌ده‌ن ، به‌جۆریك حزب و سیاسه‌ت بون به چه‌قۆیه‌كه‌ی هه‌یاس به‌رامبه‌ر به هاووڵاتیانی هه‌ریمی كوردستان ، له‌مه‌مله‌كه‌تی ئه‌نفال و كیمیاباران دا سیاسیه‌كان له كاتی بانگه‌شه‌كانی هه‌ڵبژاردن دا بۆ گه‌یشتن به‌ده‌سه‌ڵات واده‌و به‌ڵێنی خزمه‌تكردن و بون به‌خاك وخۆڵ به‌گوێی میلله‌ت دائه‌ده‌ن ، له‌كاتی شكست و قه‌یرانه‌كانیش دا واده‌ی ئه‌نجامدانی هه‌ڵبژاردن ده‌كه‌ن به‌هه‌واڵی به‌په‌له‌ی ده‌زگاوكه‌ناڵه‌كانی ڕاگه‌یاندن .
چۆن ده‌كرێ میلله‌ت غه‌رقی قه‌یران و بێ موچه‌یی و نه‌بونی خزمه‌تگوزاریه‌كان كرابێ له‌كه‌می كاره‌با و عه‌جایباتی نرخه‌كانی به‌نزین و نه‌بونی سوته‌مه‌نی ،كه‌چی حكومه‌ت له‌پشوی سه‌ری ساڵ دابێ و له‌ده‌ره‌وه‌ی ووڵات موژده‌ی ئه‌نجامدانی هه‌ڵبژاردنه‌كان بكات به‌دیاری ساڵی نوێ بۆ هاووڵاتیانی به‌ش مه‌ینه‌ت ، ده‌ی ئاخر زۆر له‌جێگه‌ی خۆیدایه ئه‌م یاریه‌تان ناو بنێین سه‌مای سیاسه‌ت به‌ئاوازی بوده‌ڵه‌كان .
له‌ئێستادا هاووڵاتیان هێنده بێزارن له‌ڕوخسارو واده‌و به‌ڵێنی به‌رپرسان ، هێنده نائومێدكراون خه‌ریكه متمانه‌یان به حه‌قیقه‌تی سێبه‌ری باڵای خۆشیان نه‌مێنێت ، ده‌زانن ناشیرینترین زه‌رده‌خه‌نه ئه‌وه‌یانه كه‌به‌رپرسان بۆ داپۆشینی شكسته‌كانیان له‌به‌رده‌م ڕاگه‌یاندنه‌كان ده‌ینوێنن .
ئیتر له‌كام گۆشه‌ی شكسته‌وه لێتان بڕوانین ، چێژ له كام جۆری سه‌ماتان وه‌رگرین ،به‌كام ئاوازی واده‌و به‌ڵێنتان سه‌رگه‌رم بكه‌ین و ئومێدی داهاتووی له سه‌ر هه‌ڵبچنین.
نوێترین نوسینەکانی کەمال ئەسکەندەر
-
کەمال ئەسکەندەر
18/08/2019
-
کەمال ئەسکەندەر
08/08/2019
-
کەمال ئەسکەندەر
05/01/2019
-
کەمال ئەسکەندەر
12/12/2018
-
کەمال ئەسکەندەر
05/10/2018
-
کەمال ئەسکەندەر
10/09/2018