میللەت لەنێوان سیناریۆی سیاسەت و حەقیقەتی کارەسات

وتار/ 24/10/2017 462 جار بینراوە

کەمال ئەسکەندەر

میللەت لەنێوان سیناریۆی سیاسەت و حەقیقەتی کارەسات
كه‌مال ئه‌سكه‌نده‌ر
سەرکردە ژیر و سەرکەوتوەکان ئەوانەبوون کە لەسەردەمی فەرمانڕەواییان دا زیاتر لەچڕینی ئاوازی زمان و کەیف خۆشی بەردەم فیکە و چەپڵەی جەماوەر گرنگیان بەڕاوێژو پێشبینیەکانی عاقڵمەندانی  نیشتمان داوە ، بەگەڕانەوەمان بۆ سێ مانگی بەرلەئێستا لەوەتێدەگەین سیناریۆ و حەقیقەتەکان لێک جیابکەینەوە ، ووردبنەوە لە کاتی بانگەشەی ڕیفراندۆم و ئاهەنگەکانی بەردەم سیناریۆی فیکەی جەماوەر چۆن خیتابی سیاسی کەوتبوە ژێر عاتیفەو سۆز بەجۆرێک چاویلکەی بیناییمان بەدەر لە خوێندنەوەیەکی دروست بۆ هۆشداریەکانی دەوروبەرو جیهان تەنها جەماوەری ئامادەبووی ئاهەنگ ئاڕاستە و بەرزی ونزمی ئاوازی ووتارەکانی دیاری دەکرد تا ئاستی حساب نەکردن بۆ هیچ هێز و مەترسیەک .

دواجار چی ؟ وەک دەڵێن نزیکەی سەدا پەنجای خاکمان لەدەست چوو ، لەگەڵ ئەوەشدا ڕژانی خوێنی دەیان شەهید و سەدان بریندار و بێ باوک کردنی سەدان منداڵ و بێوەژن کردنی دەیان ئافرەت ، ئاوارەبونی زیاتر لەسەد هەزار خێزان ، ئەوە چ سەودایەک بوو بڕیاردەرانی ڕیفراندۆم کردیان ؟ بۆچی  زەرەر لەمە گەورەتر هەیە ؟

پێم سەیرە هێشتا بەرپرسان نابەرپرسانە بە ڕیزێک ئۆتۆمبێڵەوە و بە قات وریباتێکی گرنبەها باسی نیشتمان پارێزی دەکەن ، بۆچی ! نیوە لاشەی ئەو شەهیدەتان نەبینی کەبەهۆی گیرفان بەتاڵی موبایل ەکەی فرۆشتبوو تا کرێی ئەو  تاکسی یەی پێ بدات کەپێی گەڕابویەوە سەنگەر بۆ پارستنی خاک ونیشتمان ،  دەبوایە یەکە بەیەکەتان لەپرسەی شەهیدەکان دا دەست لەکارکێشانەوەتان ئاڕاستەی میللەت بکردبوایە ! ئێستا دەبێ لەوە تێگەیشبێتن سیناریۆی سیاسەت حەقیقەتێکی کارەسات ئامێزی چەند گەورەی بەدوای خۆی داهێنا .

ئیتر میللەت لەبەیاننامە و کۆبونەوەکانتان بێزارە ، لەنمایشی بەردەم مایکی کامێراکان بێزارە ،  هەموان چاوەڕێی هەنگاوی کرداریتان دەکەن ، ئەگەر باوەڕناکەن فەرمون چاوێک بە بەیاننامە و لێدوان وقسەی ڕابردووتان دابخشێننەوە بزانن خۆشتان هێزی ئەوەتان ماوە بەدیاری دابنیشن و کاتیان پێوە بکوژن؟!

نوێترین نوسینەکانی کەمال ئەسکەندەر