دوو قۆناغی ئومێد بەخش

وتار/ 06/11/2019 653 جار بینراوە

د.رابەر فەتاح

دوو قۆناغی ئومێد بەخش

*د.رابەر فەتاح
کورد لە دوو قۆناغ و دوو رووداوی لێکنزیکدا دەیەوێ بگەڕێتەوە سەر رەچەڵەکی خۆی. ئەگەرچی چەندین ساڵە بەشێکی زۆری پارت و رێکخراو ناوەندەکانی راگەیاندن و میدیا بەگشتی بە ئاگا و بێ ئاگا لە هەوڵی سڕینەوەی کەلتور و فەرهەنگ و ناشیرینکردنی مۆرکی نەتەوەیی کوردن لە ژێر سێبەری تورک و فارس و عەرەب، بەڵام خۆشبەختانە کورد لە دوو قۆناغی یەک لە دوای یەکدا هەموو ئەو هەوڵانەی پووچەڵ کردەوە.

خۆپیشاندان و ناڕەزایەتیەکانی تەواوی چین و توێژەکانی کۆمەڵگا و رژانە سەر شەقام دژی زوڵم و زۆر و نادادی لە بەهاری ساڵی رابردو هەنگاوێکی خۆڕسکانە و لە جێ بوو لەوێدا کورد وەک و میللەت و گەل زیاتر لە چارگە سەدەیەک بوو نمایشی خۆی وەکو نەتەوەیەکی یەک ریز و یەک دەنگ و یەک رەنگ نەکردبوو، ئەوە بەو واتایە نییە کە نەیویستبێ بەلکو هۆکار گەلی سەرەوە رۆحی لە تاک بە تاکی کۆمەڵگای کوردی ساندبۆوە و جۆرێک لە نائومێدی بەخشیبۆوە تا نەتوانن گوزارشت لە هەبوونی ژیانێکی شایستە بۆ خۆیان بکەن وەکو گەل. قبوڵ نەکردن و ناشیرینکردنی یەکتر و ناوچەگەرایی و دەیان دیاردەی قیزەوەن و نەبوونی رۆحی هاوکاری ژیانی هەمووانی سەغڵەت کردبوو ئیدی لەگەڵ ئەو راچڵەکینە مێژوییە جارێکی تر کورد گەڕایەوە سەر رەچەڵەکی خۆی و گیانی وەبەرهاتەوە.

لە شکرکێشی تورکیای خوێنڕێژ لەو ماوەیەی رابردو بۆ سەر کوردستانی رۆژئاوا لەگەڵ هەموو لایەنە نەرێنیەکانی هاوکات راچڵەکینێکی ئەرێنی تر بوو بۆ تێکڕای کورد کە یەک دەنگ و یەک رەنگ دژی زوڵم و ستەم بوەستنەوە.

ئەوەی تێبینی دەکرێ لەگەڵ ئەو هێرش و پەلەماردانەی دەوڵەتی ئەردۆگانی خوێنڕێژ، کورد هەڵمەتێکی خۆڕسکانەی دەست پێکردووە ئەویش بایکۆتی کاڵای تورکییە کە دەکرێ بە شۆڕشی سپی ناویبنێن. لێردا دەمەوێت ئاماژە بە خاڵێکی زۆر گرنگ و بایەخدار بکەم کە دەکرێ و دەبێ ئومێدی لە سەر هەڵبچنین ئەویش بریتییە لە زندووبوونەوەی رۆحی هاوکاری و خۆبەخشی لە نێو تاکی کوردیدا. لەگەڵ ئەو هەڵمەتی بایکۆتەدا دەیان کەسایەتی و شارەزا و خاوەن بڕوانامەی دکتۆرا و مامۆستا هیتر خۆنەویستانە ئامادەی بەخشینی زانیاری و رێنماین تا کورد وەکو گەل بگەڕێتەوە سەر رێچکەی نەتەوەیی و خۆیبوون. ئومێدبەخشتر لەوانە تێبینی دەکرێ بە هەڵوێستی مەردانەی چەندین جوتیار و بەرهەمهێن و خاوەن زەوی کە ئامادەییان هەیە ئەوەی کە هەیانە بەشی بکەن لەگەڵ خوشک و براکانیان تا ئامانجی دروستی بایکۆت بهێننە دی. تەنانەت لە دەیان خەڵک گویبیست دەبین کە ئامادەن بەرهەمەکانیان ببەخشن تا سەکۆی بایکۆت فراوانتر و جێگیرتربێت.

کەواتە ئەو دوو قۆناغە یەک لە دوای یەکە دەکرێ ببێتە سەرەتای زنجیرەیەکی خۆڕسکانە لە پێناوی گەڕانەوەی هەیبەت بۆ کۆمەڵگای کوردی. کوردانی باشور بەو جۆرە هەڵوێستە بوێر و هەستکردن بە بەرپرسیارەتییە دەبنە پاڵپشتوو هێز بۆ کوردانی پارچەکانی تری کوردوستان. رووداوە خۆڕسکیەکان ئەستەمە بەری لێبگیرێ و بەدڵنیاییەوە دەمانگەێنێتە ئامانجی نەتەوەیی.

*زانکۆی سەلاحەدین-هەولێر

نوێترین نوسینەکانی د.رابەر فەتاح