شــــەوانە بـــازاڕ

وتار/ 23/05/2019 578 جار بینراوە

سه‌ركۆ یونس

شــــەوانە بـــازاڕ
سەرکۆ یونس/ ئابوریناس
لەمانگى ڕەمەزانى پیرۆزدا و لەگەڵ نزیک بونەوەى جەژن بەشێکى زۆرى هاونیشتیمانیان پێیان باشە بەشەودا بازاڕ بکەن و پێداویستییەکانیان دابین بکەن.
لەڕاستیدا ئەمەش دیاردەیەکى شارستانى نوێ یە و دەرهاویشتەى جیهانگیرى یە و ماوەى چەند ساڵێکە بووەتە کلتور لە کۆمەڵگاى کوردستاندا بەشێوەیەک کاریگەرى هەبووە لەسەر جموجوڵى کڕین و فرۆشتن و گەشەى ئابورى هەرێم.
 کات یەکێکە لەڕەگەزە گرنگەکانى بازاڕ و ئەو کاتەى کە کڕیارو فرۆشیار بەیەک دەگەن نرخەکان دیارى دەکرێت و کردارى ئاڵوگۆڕ ئەنجام دەدرێت ..
خۆشبەختانە بەهۆى سەقامگیرى ئەمن و ئاسایش لە کوردستاندا ڕێژەیەکى زۆرى کڕیاران بەشەو خواستەکانیان پڕدەکەنەوە و هەرچى مۆڵ و سۆپەرمارکێت و بازاڕى میللى و هاوچەرخ هەیە جمەیان دێت لە کڕیاران و هەوڵ دەدەن پێویستییەکانیان بە کەمترین تێچون و نزمترین نرخ بەدەست بهێنن ، کەدەتوانین بڵێین زۆربەى خواستەکانمان لەم کاتانەدا جلو بەرگ بۆ خانمان ومناڵان و سەبەتەى خواردن و خواردەمەنى یە و بەشێکى ترى هاونیشتیمانیان دەچنە بازاڕ و مۆڵەکان بۆ بەسەربردنى کاتێکى خۆش و قەرەبوکردنەوەى ڕۆژەکان کە بەهۆى بە ڕۆژوو بون و بەرزبونەوەى پلەکانى گەرماوە ناتوانن بچنە دەرەوە.ئەوەشمان بیر نەچێت چاولێکەرى خێزانەکان کاریگەرى تایبەتى هەیە لەسەر شەوانەبازاڕ و هۆکارێکە بۆ برەوسەندنى ئەم دیاردەیە.
لەڕاستیدا شەوانە بازاڕى هاونیشتیمانیان و کڕیاران لەمانگى ڕەمەزاندا بۆ چەند هۆیەک دەگەڕێتەوە لەوانە  زۆربەى کڕیاران بەهۆى ئەوەى کە بەڕۆژوو دەبن و زۆربەى کاتەکانى ڕۆژ لەماڵەوە پشوو دەدەن و پلەکانى گەرماش ووردە ووردە بەرزبوەتەوە و ناتوانن بچنە بازاڕەکانەوە و هەروەها بەشێکى ترى کڕیاران بریتین لە فەرمانبەرانى دامودەزگاکانى حکومەت ئەمانە بەڕۆژ لە دەوامدان و ماندوو دەبن ناچار بۆ پڕکردنەوەى پێویستییەکانیان بەشەو دەچنە بازاڕو مۆڵەکان.
ئەوەمان لەبیر نەچێت لەبازاڕەکانى هەرێمى کوردستاندا نرخەکان بەهۆى خواست و خستنەڕووە دیارى دەکرێن بەبێ دەست تێوەردانى حکومەت، لەم مانگەدا یاساى خواست کار ناکات (پەیوەندیەکى پێچەوانە هەیە لە نێوان نرخ و بڕى خواست ) واتە ئەگەر نرخ بەرز ببێتەوە ئەوا بڕى خواست دادەبەزێت بەڵام بەهۆى زۆرى خواستەوە و ناچار بوونى کڕیاران بۆ پڕکردنەوەى پێویستییەکانیان ئەم یاسا ئابورییە کارى پێ ناکرێت و خێزانەکان زۆربەى داهاتەکانیان و بگرە هەندێ جار قەرزیشى بۆ دەکەن لە پێناو دابین کردنى پێداویستییەکانیان ئەمەش بارگرانیەکى ترە بەسەر شانى لێپرسراوانانى خێزانەکانەوە و خەرجییەکانی خێزان لەم مانگەدا دوو ئەوەندە و زیاتریش دەبێت !
لەلایەکى ترەوە بەسەیرکردنى خێرا لەهەموو ئەو بازاڕکردنانەى کە ئەنجام دەدرێت دەردەکەوێت کەبەشى هەر زۆرى خواست بۆ کڕینى شمەک و کەلوپەلى کەمالین (جوانکارى،ڕوواڵەتى) ئەمەش ماناى گۆڕانکارییە لە گوزەرانى هاوڵاتیاندا بەرەو باشبون و لەلایەکى ترەوە بەداخەوە کڕیاران و بەکاربەران زۆر زوو قەیرانى دارایى و ئابورى کوردستانیان لەبیرکردوە و هەرچەندە هێشتا قەیرانەکە بەتەواوەتى بنبڕ نەکراوە هەر بۆیە پێویستە بزانین کە ئیدارەدانى ئابورى دروستى بەکاربەران ئەوەیە کە پاشەکەوت بکەین و هەرچى مایەوە خەرجى بکەین نەک بە پێچەوانەوە داهاتەکانمان خەرج بکەین و هیچ بڕە پارەیەک پاشەکەوت نەکەین.
ئەوەى لێرەدا گرنگە تیشکى بخەینە سەر بۆ ئەوەى هەردوولا (کڕیاران و فرۆشیاران) بتوانن ئامانجەکانیان بەدەست بهێنن لە بەرژەوەندى هەردولا ئەم مانگە پیرۆزە بەڕى بکرێت و ئیستیغلال کردنى تێدا نەبێت لە ڕووى نرخ و جۆرى شمەک و کاڵاکانەوە وئەم هەلە نەکرێت بۆ ساغکردنەوەى شمەک وکاڵاى خراپ و ماوە بەسەرچوو، هەردوولا بەچاوێکى نەتەوەیى و ئایینى یەوە لەم دیاردەیە بڕوانن.جێگاى خۆیەتى دەستخۆشى لە هێزەکانى ناوخۆ بکەین بۆ هەوڵ و ماندوبونیان و ڕەخساندنى کەشێکى ئارام و سەقامگیر کە دڵنیایی بە هەموولایەک دەدات ..
هیوادارین ئەم دیاردە شارستانى یە لەساڵانى داهاتودا بەردەوام بێت و گەشەى زیاترى پێ بدرێت و ئەم ڕووە گەشە جوانەى ئابورى و کۆمەڵایەتى و پێکەوە ژیانیەى کوردستان بەهەموو لایەکى بگەیەنین...

نوێترین نوسینەکانی سه‌ركۆ یونس