هەڵۆکانی گۆڕان کوان؟ باڵ کراون یان بون بە کۆتر؟
وتار/
27/10/2017
1017 جار بینراوە
پەیمان عیزەدین
هەڵۆکانی گۆڕان کوان؟ باڵ کراون یان بون بە کۆتر؟
په‌یمان عیزه‌دین
لە خولی سێیەمی پەرلەمان و لە یەکەم فراکسیۆنی گۆڕانەوە
هەردو زاراوەی (هەڵۆ و کۆتر) وەک تەنزێکی سیاسی هاتە ئارا، هەڵۆکان تا رادەیەک
توندڕەوەکان بون و کۆترەکانیش میانڕەوەکان، ئەم دوو ئاڕاستەیە وەک زۆربەی جوڵانەوە
سیاسیەکان تا ئێستاش لەناو گۆڕاندا هەن .
بۆ یەکەم کاری پەرلەمانی گۆڕان و بۆ ئەو بارودۆخەی ئەو
کاتە ، بونی ئاراستەی توندڕەو بۆ بنبڕکردنی گەندەڵی گرنگیەکی زۆری نەبو چونکە بە هەڵۆ
و کۆترەکانیشەوە ئەچون بەگژ ستەمکاراندا و کۆی بزوتنەوەکە سەرگەرمی چالاکی و کردار
و دروستکردنی روداو بو، بەڵام لە ئێستای دۆخی سیاسیدا ولەم هەمو ڕوداوە کتوپڕ ولەناکاوانەی
پارتی دروستی دەکات وباقی حیزبەکانی ترچەپڵە لێدەرن یا تەماشاکەر ، ڕۆڵی هەڵۆکان نەک
تەنیا لە گۆڕان بەڵکو لە پارتەکانی تر و لە کۆی کۆمەڵگاشدا زەرورەتە.
لە ئێستادا گەورەیی قەیرانەکان وگەرمی ڕوداوەکان و خێرایی
گۆڕانکاری بەسەریاندا، کۆبونەوەی بەردەوام و بەیاننامەی لەبننەهاتوی گۆڕان دەرەقەتی
نایەت و چارەسەری پێناکرێت.
ئێستا کاتی سەرکێشی و موجازەفەی سیاسی هەڵۆکانە ، کاتی دەرچونە
لە پیاهەڵدان بە ڕۆڵ و خەبات و سەروەری گۆڕان و سەرکردەکانی، ئەگەر ئەندامانی گۆڕان
دەربەستی بە زیندو مانەوەی گۆڕانن دەبێت ڕاشکاوانە دان بەو ڕاستیەدا بنێن کە سەرکردایەتی
و خانەی ڕاپەڕاندنی گۆڕان توانای بەڕێوەبردنی هێزێکی سیاسی ڕادیکاڵیان نیە،
ناتوانن لە بازنەی حیزبایەتی تەقلیدی دەربجن و توانای پێشڕەویی کردنی فیعلیان نیە.
بۆ دەربازبون لەم خاو و خلیچکیەی گۆڕان دەبێت ڕادیکاڵەکانی
ناو گۆڕان پەلە بکەن لە ژیاندنەوەی گۆڕان و ئەگەریش پێیان ناکرێت کات لە گلەیی و
ناڕەزایەتیدا بەفیڕۆ نەدەن و لەدەرەوەی گۆڕان هێزێکی سیاسی گوشاردروستکەر پێک بێنن،
ئەگەر نا شتێک نامێنێت بە ناوی هەڵۆ یان بە باڵکراوی و بۆڵەبۆڵی ناخۆ دەمێننەوە یان
هەموی پێکەوە کۆتر ئەبن.
نوێترین نوسینەکانی پەیمان عیزەدین