یەكێتی و پارتی و مه‌یمونەكانی جۆرج ئۆرویڵ

وتار/ 20/07/2020 547 جار بینراوە

هێمن باقر

یەكێتی و پارتی و مه‌یمونەكانی جۆرج ئۆرویڵ

 
هێمن باقر
ـ جارێكیان جۆرج ئۆروێل،ڕۆمان نوسی بەناوبانگی ئینگلیزی وتبوی" مەیمونەكان كاتێك شەڕ دەكەن، تەواوی كیڵگە كشتوكاڵیەكە وێران دەكەن، كاتێكیش لە ئاشتیدان كه‌ پێكەوە تەواوی بەروبومی كێڵگەكە دەخۆن".
ـ لەم ڕۆژانەدا گەڕێكی دیكەی ناكۆكیەكانی نێوان پارتی و یەكێتی دەستی پێكردەوە، بەدەیان كەناڵ و سەدان سایت و هەزاران پەیج پڕبووە لە شەڕە دەنوك و شەڕە جنێوی پارتی و یەكێتی.
ـ شەڕێكی كۆنی چەند ساڵە هەموو جارێك بە بەرگێكی نوێوە دوبارە دەبێتەوە.
ـ ئەوە نزیك دەبێتەوە لە 60 ساڵ ناكۆكی جەلالی و مەلایی، ناكۆكیەكی دور لە فیكر و روئیاو لێوانلێو لە حقد و بوغز و بەرژەوەندی شەخسی. چی لەم ناكۆكیانە سەوز بوو؟ جگە لەوەی كە خەڵكی كوردستان باجەكەیاندا؟
ـ زیاتر لە 10 هەزار گەنجی كورد كرانە سوتماكی ئەم شەڕ و ناكۆكییە. باشوری كوردستانی لە بناغەوە هەڵتەكاندو كردی بە دوو زۆن و دوو ئاراستەی جیاوازی دژ بەیەك، شیرازەی كۆمەڵگا و ئاشتی كۆمەڵایەتی لەناو برد و لەبری ئەوە براو برا و دراوسێ‌ و دراوسێ‌ و هاوزمان و هاوزمانی كردە دوژمنی یەكتریی.
ـ یەكێتی و پارتی، وەك مەیمونەكانی جۆرج ئۆروێل ماوەی 40 ساڵە لەكاتی ئاشتیدا پێكەوە سەرچاوە و داهاتی ئەم وڵاتە دەخۆن و وەك سەرمایەی شەخسی خیان كەڵەكەی دەكەن.
ـ بەپێی هەندێ‌ سەرچاوە لە دوای 2003 وە تائێستا زیاتر لە 150 ملیار دۆلار هاتووەتە هەرێمی كوردستان و نیوەی كەمتری ئەو بڕە پارەیە بۆ خەڵك خەرجكراوە.بەشی زۆری ئەم پارەیە كراوەتە سەرمایەی بنەماڵە و بەرپرسانی پارتی و یەكێتی و كەسانی دەستڕۆیشتوو لەناو حیزبدا.
ـ ئێستاش كە دۆخی ئابوری هەرێم ڕوو لە لێژییە، خەریكی تێكدان و كاولكردنی كوردستانن و هیچ منەتیان نییە بە چارونوسی هەرێم و بژێوی و ژیانی خەڵك.
ـ بەدڵنیایەوە ناكۆكیەكانی ئەمجارەشیان نە لە پێناوی كوردستان و نە لە پێناوی خەڵكیدایە،بەڵكو لە پێناوی چنینەوەی بەشی زیاتر و بەشداریكردنی هەندێ‌ ناوەندی بڕیاردایە كە هێشتا پێیان وایە كەمیان دەست دەكەوێت لەو تاڵان و بڕۆیەی كە هەیە.
ـ ئەمانە لە هەردوو بارەكەدا زیانن بۆ میللەت، دروست وەك ئەو مەیمونانەی جۆرج ئۆروێل باسی دەكات یان بەیەكەوە كێڵگەكە دەخۆن یان بەهەردوكیانەوە وێرانی دەكەن.

نوێترین نوسینەکانی هێمن باقر