ئاگاداری سنورەکان بن!!!!

وتار/ 17/03/2020 879 جار بینراوە

ئارام مەجید عەلی

ئاگاداری سنورەکان بن!!!!

ئارام مجید شەمێرانی
تکایە ئاگاداری جموجوڵی ناوچە سنورییەکان بن بۆ گواستنەوەی فایرۆسی کۆرۆنا و هاکات ئاگاداری گەشتیار و کەسە گەڕاوەکانی ئێران بن بۆ هەرێمی کوردستان و بیانخەنە ژێر چاودێری وردی تەندروستی و کەرەنتینە بکرێن، مێژوو لەسەردەم و کاتی جیاوازدا خۆی دووبارە دەکاتەوە.

مێژوو پێمان دەڵێت کاتێک مەدحەت پاشا کرایە والی عێراق کۆمەڵێک چاکسازی گرنگی ئەنجامدا،یەکێک لە چاکسازییەکانی لەبواری کۆمەڵایەتی و تەندروستیدا بوو،دەستی کرد بەدامەزراندنی چەند خەستەخانەو (کەرەنتیەک-حجر الصحی) بەتایبەت لەشار و شارۆچکەکانی سەرسنوری نێوان عێراق و ئێرانی ئەو سەردەمە وەک:( بەسرە،قورنە،عیمارە،خانەقین، سلێمانی، ڕەواندز،مەندەلی). بۆئەوەی بتوانێت سنورێک بۆ بڵاوبوونەوەی نەخۆشییەکانی(کولێرا و تاعون) دابنێت، کەبەزۆری لەڕێگەی ئەو گەشتیارە ئێرانیانەوە بڵاودەبونەوە کەسەردانی عێراقیان دەکرد[1].
کەواتە مێژوو بۆی سەلماندوین ئێران دەروازەیەک بووە بۆ گواستنەوەی بەشێک لەنەخۆشییەکان و ڤایرۆسی کۆرۆناش ئەم ڕاستییە مێژووییەی بۆسەلماندین هەندێک لەوکەسانەی لەئێران گەڕانەوە بۆ عێراق و باشوری کوردستان هەڵگری ئەو ڤایرۆسەن.
ڕاستە وەک هەرێمی کوردستان سنورێکی زۆرمان لەگەڵ ئێران هەیە بەڵام پێویستە زۆر بەگرنگیەوە بڕوانینە سنورەکانی ئێران و ئاگاداری گەشتیار و کەسە گەڕاوەکانی ئێران بین بۆ هەرێمی کوردستان،چونکە لەم کاتەدا ئێران و ناوچە سنورییەکان دەروازەیەکن بۆ گواستنەوەی ڤایرۆسی کۆرۆنا،لەئێستادا کۆرۆنا لەزۆربەی ناوچەکانی ئێران بڵاو بووەتەوە،ئەمەش لەپێناو پاراستنی سەلامەتی هاوڵاتیانی هەرێمەکەمان، پێویستە هەمووان زۆر چاوکراوە بین و گومانمان لە هەر گەشتیار و ئێرانیەک هەرکەسێک هەبێت بەڕێگەی نایاسایی گەڕابێتەوە ئەوە بێ دوودڵی لایەنی پەیوەندیداری لێئاگادار بکەینەوە،ئەمەش خزمەتێکە بەنیشتیمانەکەمان.

[1]سەرچاوە: مێژووی هاوچەرخی عێراق،ئەحمد باوەڕ،چاپی یەکەم،2018،ل26، لە محمد عصفور سلمان،العراق فی عهد مدحت باشا،ص86-87 وەریگرتووە.

نوێترین نوسینەکانی ئارام مەجید عەلی