کورد و پەرتەوازەیی

وتار/ 24/05/2018 690 جار بینراوە

ئارام مەجید عەلی

کورد و پەرتەوازەیی
ئارام مەجید شەمێرانی
کاتێک مێژووی نەتەوەی کورد دەخوێنیتەوە مرۆڤ توشی سەرسوڕمان و بێزاری دەبێت و لەنێو لاپەڕەکانی مێژوو وێڵ دەبیت و ڕووبەڕووی چەندین هەوڵی پەرتەوازەیی دەبێتەوە وەک بڵێی هەر لەئەزەلەوە کورد لەگەڵ پەرتەوازەیی هاتووە و پێکەوە لەدایک بوون و پێکەوە هاتونەتە سەرزەوی و خاکی کوردستان.

لەمێژوودا کەم نەتەوە هەیە وەک کورد ئاشنای چەمکی پەرتەوازەیی بێت و تێکەڵی خوێنی بووبێت، زۆرجار لەنێو نەتەوەکانی دیکە ڕووداوێکی مێژوویی ڕوویداوەو پەرتەوازی نەتەوەیی لەکۆڕ ناوە و ئیدی وەک نەتەوەیەکی یەک دەست و یەک هەڵوێست هاتونەتە نێو شانۆی ژیان و تابلۆی ژیانی خۆیان بەجوانترین شێوە لەسەر گۆڕەپانی سیاسی و کۆمەڵگەی مرۆڤایەتی نەخشاندووەو وێنەیەکی جوانی نەتەوەییان پیشانی نەتەوەکانی دیکەی سەر زەوی داوە.

بەڵام مێژوو بۆی سەلماندوین نەتەوەی کورد پێچەوانەی هەموو نەتەوەکانی دیکە هەرگیز نەیتوانیوە سوود لەهەلەهەڵکەوتووەکان و ڕووداوە مێژووییەکان وەرگرێت و پەرتەوازەیی خۆی لەنێو لاپەڕەکانی مێژوو ون بکات و وەک نەتەوەیەکی یەک دەست و یەک هەڵوێست دەرکەوێت بۆ هەمیشەیی چەمکی پەرتەوازەیی لەگۆڕنێت.

کورد یەکێکە لەونەتەوانەی سیستمی خێڵەکی و ئاغا و بەگ و دەرەبەگایەتی و سیستمی میر و میرنشینی و سیستمی حیزب و ڕێکخراوەیی بڕی بەڵام هەرگیز نەیتوانی سیستمی پەرتەوازەیی تێپەڕێنێت،چونکە پەرتەوازەیی تێکەڵ خوێنی کورد بووە و مودمین بووە بەم چەمکە، جگەلەوەش لەباشوری کوردستان چەندین ڕووداوی گرنگی مێژوو ڕوویدا بەڵام نەمان توانی پەرتەوازەیی تێپەڕێنین و تەنانەت بەهۆی پەرتەوازەیشەوە هەموو هەلە مێژووییەکانمان لەدەستدا.

هەلە هەڵکەوتوەکانی سەردەمی میرنشینەکان و کۆتایی جەنگی یەکەمی جیهانی و هەلەکانی سەردەمی شۆڕشەکانی باشوری کوردستان لەبیستەکانی سەرەتای سەدەی بیستەم و ناوەڕاستی سەدەی بیستەم و دەیەی کۆتایی سەدەی بیستەم هەمووی بەهۆی پەرتەوازەیی لەدەست دران و تەنانەت هەموو هەلەکانی چارەکی یەکەمی سەدەی بیست و یەک و ڕووخانی ڕژێمی بەعس و لاوازی عێراق و دوا هەلی هەڵکەوتوو کە هاتنی داعش و داگیرکردنی بەشێکی زۆری عێراق و نەمانی سوپای نیزامی عێراق بەهۆی هاتنی داعشەوە،بەڵام دیسان بەهۆی پەرتەوازەیی کورد خۆیەوە ئم هەلە لەدەست دراو گەڕاینەوە چوارگۆشەی یەکەم و خالی سەرەتا، بەمەش زیانیکی زۆرمان لەدۆزی ڕەوای کورد دا.
پەرتەوازەیی بەجۆرێک ئاوێزانی کورد بووە ناتوانێت بۆ چەند ساڵێک بێ پەرتەوازەیی بژی، کاتێک حیزبێک کارێکی باش دەکات حیزبێکی دیکە دژیەتی و کاتێک حکومەت لەلا لایەنێک دەبێت لایەنێکی دیکە دژیەتی، تەنانەت پەرتەوازەیش گەشتوەتە ئەو ئاستەی ئەگەر لایەنێک دەوڵەت دروست کات لایەنێکی دیکەی کورد دژیەتی، ئیتر ئەمە حاڵی کوردە بەمەش پەرتەوازەیی و کورد دووڕووی یەک دراون و ئەستەمە ئەم سەدەیەش کورد و پەرتەوازەیی لێک جیا بکرێنەوە،ئەشێت لەهەردێڕێکی مێژووماندا کاتێک باسی کورد و شۆڕشێکی دەکرێت لەدێڕی دواتریدا باس لەپەرتەوازەیی کورد بکرێت،دواجار تا کورد ئەمە حاڵی بێت و عاشقی پەرتەوازەیی بێت هیچمان دەست ناکوێت و لەنێو دێڕەکانی مێژو بەزەلیلی و ژێردەستەی دەمێنینەوەو و باس دەکرێین، بەمەش پەرتەوازەیی بەشێکی دیاری لەئەدەبیاتی کورد داگیرکردووە بووە بەشێک لەئەدەبیاتی سیاسی و کولتوریمان و مێژوو و ئەدەبیاتی کەم نەتەوە هەیە هێندەی مێژوو و ئەدەبیاتی کورد زەلیلی دەستی پەرتەوازەیی بێت.

نوێترین نوسینەکانی ئارام مەجید عەلی