هـەرزان فرۆشی خاک و مـرۆڤ

وتار/ 28/11/2017 879 جار بینراوە

ئارام مەجید عەلی

هـەرزان فرۆشی خاک و مـرۆڤ
ئارام مەجید عەلی
لەنێو هەموو دەوڵەت و نەتەوەکانی جیهاندا، هەرزانترین و بێ بەهاترین خاک و مرۆڤ، خاکی کوردان و تاکی نەتەوەی کوردە کە هیچ نرخ و بەهایەکی نیە.
هەموو دەوڵەتان لەپێناو خۆیان و پاراستنی بەرژەوەندیەکانی خۆیان ئامادەن لەگەڵ سەرسەخترین دوژمنی خۆیان ڕێک بکەون دەست لەنێو دەستی یەکتربنێین و تەنازول بۆ یەکتربکەن، بۆ ئەوەی کورد نەبێت بەهێچ و نەگات بەئاوات و خاکەکەشی هەرزان فرۆش بکرێت،لەم هەرزان فرۆشیەدا هیچ بەهایەکی ئاینی و مەزهەبی و مرۆیی لەسەر کورد و خاکەکەی بوونی نیەو نابێت،
چونکە کورد خۆیشی بەهای بۆخۆیی و خاکەکەی نیەو ئامادەیە بۆ پشت شکانی براکوردەکەی خۆی و دۆڕانی بەشێک لەخاکەکەی بۆ بەرژەوەندی خۆی دەست بخاتە نێو دەستی دۆژمنەکەی و تەنازولیشی بۆ بکات،بەڵام هەرگیز ئامادەی ئەوەی نیە لەگەڵ براکاردەکەی خۆی ڕێکبکەوێت و تەنازول بۆ یەکتربکەن،ئەمەش وادەکات هەرزان بازاڕی تاکی ورد و خاکەکەی لێبکەوێتەوە، ئەمەش ڕێگە خۆشکەرە جیهانیش بەچاوی هەرزان بازاڕی خاک و نەتەوە لێمان بڕوانێت هێچ بەهایەکمان نەبێت،بێدەنگی ئەوانی لەئاست هەموو کارەسات و ڕووداوە ماڵوێرانیەکان بەڵگەی ئەم ڕاستیەن کەئێمەی کورد و خاکەکەمان بەهایەکی ئەوتۆی نیەو ئەوەتا وەک خاک و وەک نەتەوە، وادابەشکراوین هەر پارچەو کۆمەڵێکمان بەدەست کۆمەڵە گورگێکی برسیەوەیە کەتێربونیان لەخاک و تاکمان ئەستەمە.
ئەم بێ بەهابونەمان لەمێژە هەیەو بەردەوامەو بەردەوامیش دەبێت، چونکە ئێمەی کورد وەک ژمارە و هێمای یاریدەدەر بەکاردێین بۆ پڕکردنەوەی کەلێنەکان و کەم و کورتی ئەوان و پاراستنی بەرژەوەندیەکانیان،هەرگیز وەک ژمارەی سەربەخۆو نەتەوەی خاوەن پێگە هەڵسوکەوتمان لەگەڵ ناکرێت.
لە هاوکێشە سیاسیەکانی ڕابردوو و ئێستادا، هەرکات پێویستیان بەکورد و خاکەکەی بوبێت ئەوا ئێمەی کورد و خاکەکەمان بەئاسانی بەکارهێنراوین،هەرکات بەرژەوەندی ئەوان وای خواستبێت لەگەڵ دوژمنەکانی خۆیان بگەنە ڕێکەوتن و یەکلایکردنەوەی بەرژەوەنی،ئیدی کورد و خاکەکەی وەک پارویەکی چەور هەپرون هەپرون کراوەو قوتدراوە،یان بەئاسانی جەستەی خاک و نەتەوەمان قەڵتانی خوێن کراوەو بەوپەری داماوی و بێکەسی بێ کوێدانە بەها ئاینی و مەزهەبی و مرۆییەکان فڕێ دراوینەتە پەراوێزی ڕووداوەکانی مێژوو، بەشێوەیەک ڕێگە بەبوون و مانەوەمان دراوە هیچ بەهاو ئەرزشێکمان نەبێت و نەتوانین ببینە ژمارەیەک ترسمان بۆ ئەوان و بەرژەوەندیەکانیان هەبێت،
لەڕاستیدا لەم هەرزان بازاڕیەی خاک و نەتەوەدا ئێمەی کورد،خۆمان دەستمان هەبووەو هەیە،هەر ڕۆژەو دەستی دەوڵەتێک دەگرین و دەبینە ڕێنیشاندەریان بۆسەر خاک و نەتەوەکەمان، کۆمەڵێک تورک دێنێت و کۆمەڵێک فارس و کۆمەڵێک عەرەب، بۆسەر خاک و براکانمان، جگەلەوەش هەرخۆمان بەدەستی خۆمان خاک و نەتەوەکەمان بەشبەش کردووە، هەر حیزبێک ناوچەیەک، شارێک، شاخێک، هەرێمێکمان دابەش و داگیرکردووە، بەجۆرێک ئامادەبوین و ئامادەین دەست بخەینە دەستی دوژمناکانی کورد بۆ پشت شکانی براکوردەکان و دابەشکردنی خاکمان، ئەمەش وایکردووە خۆمان هۆکاری ئەم هەرزان بازاڕیەی خاک و نەتەوەکەمان بین، هیچ ڕێز و بەهایەکمان نەبێت لای دۆست و دوژمن، وەک لەکوردەواریدا دەوترێت: خۆت ڕێز لەخۆت ناگریت کەس ناچار نیە ڕێزت لێبگرێت، ئەگەر خۆمان خاک و نەتەوەمان هەرزان فرۆش نەکەین کەس توانای ئەوەی نیە بمان خاتە بازاڕی هەرزان فرۆشانەوە.

نوێترین نوسینەکانی ئارام مەجید عەلی