(پێش زەنگی ساڵی نوێی خوێندن) پەیامێكی هێمنانە بۆ وەزیری پەروەردە
وتار/
13/09/2016
860 جار بینراوە
فەهمی حەمە تۆفیق
(پێش زەنگی ساڵی نوێی خوێندن) پەیامێكی هێمنانە بۆ بەڕێز وەزیری پەروەردە
بەناوى خواى بەخشندەى ميهرەبان
بەڕێز / وەزیری پەروەردە
سڵاوی خوات لێبێت..
سەرەتا لە خوای گەورە نزای خێر بۆ قبوڵبوونی حەج و عیبادەتی
حاجیانمان ئەكەم و جەژنی قوربان لە هەموولایەك پیرۆز بێت.. خوای گەورە پێشمەرگە نەبەردەكانی
سەنگەری بەرگری لە خاك و خەڵكی كوردستان بپارێزێت و بەسەر دوژمناندا سەركەوتوویان
بكات..
بەڕێز.. د.پشتیوان..
لەرووی هەستكردن بە بەرپرسیارێتی و پیشەیی بوونی كارەكەمەوە
لە خزمەتی پەروەردەو خوێندندا، بە ئەركی خۆم زانی بۆ یادخستنەوە ئەگەر بیستووتەو،
بۆ ئاگاداربوونیش ئەگەر ئاگادارنەكراویت، ئەم نامە كراوەیەت ئاراستە بكەم، بەهیوای
ئەوەی لەئاستی بەرپرسیارێتی سەرشانتدا بەدەم خەمی مامۆستاو قوتابیان و پێداویستییەكانی
پەروەردەو خوێندنەوە بچیت و، چیتر ئازاری دەروونی نەكرێت بە گەرووی مامۆستا و
قوتابیانی كوردستاندا كە جەنابتان وەزیری وەزارەتەكەیانی..
جەنابی وەزیر.. دەزانن ئێستا مانگی ئەیلول نیوە بووەو دەبوایە
مامۆستایان چاوەرێی موچەی ئەم مانگە بوونایە كە كراوە بە نیو و روبعە موچە، كەچی وەك
مزگێنی هەواڵی موچەی مانگی تەموزیان پێ دەدرێت؟! ئەمە لەكاتێكدا كە بڕیاری پاشەكەوت
درا بەڵێنی ئەوە درا كە مانگانە موچە 30 رۆژ تێپەڕ ناكات!! كەچی هیچ مانگێك لەكاتی
خۆیدا نەدرا تا موچەخۆران بتوانن بەرنامەڕێژی خەرجی خۆیانی لەسەر بكەن!! ئاخر كەی
رەوای حەق بوو لەم ساتە پێویستەدا هاوڵاتیانی هەژار بە گیرفانی خاڵی و دەرونی
نائارامەوە جەژن بەڕێ بكەن؟!
بەڕێزم.. دەزانی چەند جارێك بەڵێنی خەرجی نیوموچەكەی
مانگی ئەیلولی پارتان دا بە گوێی مامۆستایاندا، بەڵام نەتوانرا تەنانەت سیستەمی
پاشەكەوتیش لە ئاستێكدا بێت ئامانجی خزمەتی موچەخۆران بپێكێت، ئیتر بەڵێنی نەفەوتانی
موچەكانی تر با بوەستێ كە سەری نرایەوەو ئەم بارودۆخە جێی گرتەوە، ئیتر نەمانزانی
پاشەكەوت چی بۆ هاوڵاتیان و مامۆستاو فەرمانبەران دەست خست بێجگە لە خەفەت و مەینەتی
و چاوەڕوانی و هەژاركردن و، مامۆستایان و موچەخۆران چۆن بڕوا بكەن كە بەم حاڵەوە دەتوانرێت
بەو سێ مانگ و نیوەی ئەمساڵ كە ماوە، موچەی پاشەكەوت نەكراوی شەش مانگ بدرێت؟!
ئاخر گرەنتی چی هەیە بۆ نەفەوتانی سێ موچەی تر لەمساڵدا وەك چۆن پارساڵ وای بەسەرهات؟!
ئیتر بەو دڵ و دەرون و هەستە ناخۆش و نائارامەوە چاوەڕێی چی دەكەی تا خوێندن و پەروەردە
پارێزراو بێت و پێشكەوتن روو لە وەزارەتەكەی جەنابتان بكات؟..
بەڕێزتان و زۆر بەرپرسی تری حكومەت و دڵسۆزانی تری پەروەردە
باس لە پاراستنی نەوەكانمان و رۆڵەی هەژاران دەكەن و مەترسی چارەنوس و دوارۆژیان دەخەن
پێشچاو، هەموومان هاوڕاین كە ئەو دواڕۆژە روناكەی نەوەكانمان لەسەر پەروەردەیەكی
دروست و زانستێكی پێشكەوتوو وەستاوە، بەڵام ئەوەش بە مامۆستای خاوەن دەرونێكی
ئاسودەو خۆشبەخت و قوتابی ئامادەساز بۆ وەرگرتنی ئەو پەروەردەو فێركردنە ئەنجام دەدرێت،
نەك هەردوولا بەردەوام بە دەردی نەبوونی و گرفتی داراییەوە بناڵێنن، ئاخر پەروەردەو
فێركردن چۆن بەو دەرونە نائاسودەیە ئەنجام دەدرێت، كە هۆكاری سەرەتا و كۆتایی گرفتەكان
هەر لە حكومەتەوە سەرچاوەی گرتووە! مامۆستایان ناحەقیان نیە بپرسن ئەم هەموو داهاتی
ناوخۆ و پارەی فرۆشتنی نەوتەی هەرێم چی لێ بەسەردێت؟ كاتێك نرخی نەوت بوو بە دوو هێندەو
موچەی پێشمەرگەش لەلایەن ئەمریكیەكانەوە دابینكرا و، داهاتی ناوخۆش زۆر زیادی كرد
و موچەش پاشەكەوت كرا، كەچی باری بژێوی فەرمانبەران خراپتر بوو، كە هەر ئەمەیە نیگەرانی
و توڕییەكان زیاد دەكات و باوەڕی خەڵكی بە نەبوونی پارە و داهات ناهێڵێت..
بەندە ئاگادارم بەڕێوەبەرێكی هۆڵی تاقیكردنەوەی پۆلی
دوانزەی ئامادەیی لەم خولەی دووەمدا نەیدەتوانی ئاو بۆ قوتابیانی هۆڵەكەی بكڕێت تا
ئەو كاتەی بۆی خەرج دەكرێتەوە، چونكە پارەی پێ نەبوو، مامۆستایەك لە دەرەوەی شار خەمی
ئەوەی لێهاتووە چۆن پارەی هاتوچۆ بۆ قوتابخانەكەی پەیدا بكات، مامۆستایەكی تر دەڵێت
من خۆم هەرچۆن بێ هاتوچۆ ئەكەم بەڵام چۆن پارەی پاسی مناڵەكانم بۆ قوتابخانە دابین
بكەم، یەكێكی تریش ئەڵقەی زێڕی هاوسەرەكەی فرۆشتبوو ووتبووی ئەوە بۆ دوومانگی پێشوو
بوو ئەی بۆ داهاتوو چی تر بفرۆشم، ئەمانەو چەندین چیرۆكی تری تراژیدی مامۆستایان و
قوتابیان رۆژانە روودەدەن و گوێیەك نییە بۆ بیستنیان، ئیتر پارەی مامۆستایانی گرێبەست
و وانەبێژی مامۆستایان و چاودێری هۆڵەكانی خولی یەكەم و....هتد با بوەستێت، ئەگەر
وا بڕوات ژیان و گوزەرانی بەشێكی زۆری مامۆستایان دەبنە قوربانی و پرۆسەی پەروەردەش
بەرەو شكستی زیاتر هەنگاو دەنێت.
جەنابی وەزیر.. بەڕێزت بە حوكمی پۆستە حیزبییەكەت كە ئەندامی
سەركردایەتیت و حیزبەكەت سەرۆكایەتی حكومەت دەكات، دەتوانی بۆ سەركەوتنی پرۆسەی پەروەردە
لە وەزارەتەكەتدا داوا بكەیت و بۆ دابینكردنی خواستی مامۆستایان و قوتابیان فشار
بكەیت، دڵنیات دەكەم بە سەركەوتنی وەزارەتەكەت سەركەوتنی پەروەردەو پێگەیاندنی نەوەكانی
هەرێمەكەمان و لەوێشەوە تەواوی سیكتەرەكانی تری كار و ژیان سەركەوتوو دەبێت، ئەوەش
دەستكەوتێكەو دەتوانی بۆ ئێستاو داهاتوو شانازی پێوە بكەیت، بەڵام ئەوەش لەبیرنەكەیت
كە شكستی هیچ كەرت و پرۆژەو سێكتەرێك هێندەی شكستی پەروەردەو خوێندن زیان ناگەیەنێت
و دەبێت بەردەوام غەمی بۆ بخۆیت، هەر ئەمەش یەكەمین هۆكاری هەر زیادبوونێكی دیاردە
خراپەكانی فەوتانی چارەنوسی منداڵان و گەنجانی كۆمەڵگاكەمانە، زیانەكانیشی بۆ هەموو
كۆمەڵگای كوردەوارییە نەك تەنها شار و شارۆچكەو دەڤەرێك، بۆیە ئێستا كە لە پێشمانە
با لەكیس نەچێت و ئەگەر هەنگاوی گەورەو بەپەلە بنێیت دڵنیابە لە داهاتوویەكی نزیكدا
بەرهەمی سەركەوتنەكانی وەردەگریتەوە..
بەرێزتان باش لە نیگەرانیەكانی مامۆستایان تێدەگەن و دڵسۆزییەكانیان
شاراوە نییە، بۆیە هیوادارم رێگە نەدەن لێدوانی برینداركەر و ئیستیفزازی هێندەی تر
توڕەیان بكات، تا زیان لە نیوەی بگەرێتەوە، بەڵكو گرنگە پێش هەر كەسێك وەزارەتی پەروەردە
وەڵامی لێدوانە هەڵەكان بداتەوە كە دژ بە خواستەكانی مامۆستایان دەدرێن، لەلایەكی
ترەوە دواخستنی دەستپێكی دەوامی خوێندنی ساڵی نوێ لە زاری بەڕێزتانەوە بە بێ هۆكارێكی
دیار، سەرەڕای بوونی رەخنە، دەرفەتە بۆ ئەوەی دوو هەنگاوی گرنگ بۆ كادیرانی پەروەردەو
مامۆستایانی وەزارەتەكەت دەست بخەیت:
یەكەم/ كۆششی تەواو بكەیت تا لەم مانگەدا موچەی هەردوو
مانگی تەموز و ئاب دابەش بكرێت..
دووەم/ پاشەكەوتی موچەی پەروەردە نەمێنێت یان رێژەكەی كەم
بكرێتەوە بۆ ئاستێكی زۆر كەم، بەشێوەیەك چیتر مامۆستایان ئاتاجی پێویستی تر نەبن بۆ
ژیانیان و بە گەرموگوڕی ساڵی نوێ دەست پێ بكەن..
ئەمەی بۆ جەنابتانم نوسی بە بێ هیچ زۆر لەخۆكردنێك هەستی
ناخی خۆمەو لە روانگەی پەرۆشیم بۆ ژیان و گوزەرانی مامۆستایان و پەروەردەی رۆڵەكانمان
بەم شێوازە دەرم بڕیوە، ئیتر ئەگەر لە زمانی توڕەی مامۆستایانیش نیگەران بن، هیوادارم
ئەم نامە هێمنانەیە قبوڵ بكەن و، لە سۆنگەی دڵسۆزی و هەست بە بەرپرسیاری و ئامادەیی
چارەسەری كێشەكانەوە وەڵامێكی دڵخۆشكەری مامۆستایان بدەنەوە، هەروەك گرنگە ئەوەش
بزانیت كە سستی نواندن و دواخستنی بەجێهێنانی بەڵێنەكان بۆ دوای وادەی دەستپێكی زەنگی
ساڵی نوێ، لەدەستچوونی دەرفەتەكانەو، نابێ چاوەڕێی ئەنجامێكی باش بیت، وەك ئەوەی
ئومێدی بۆ دەخوازرێت، زیانی خوێندن لە دەڤەرێكی گەورەی هەرێمیشدا جێی دڵخۆشی نییە
بەوەی دەڤەرەكەی تر ئارامە، ئەوەندەی ئاماژەی خراپتری تێدا دەبینرێت لە رووی سیاسی
و ئیدارییەوە، بۆیە نابێ بهێڵیت ئەو ئاماژەیەش لە كەرتی پەروەردەدا رەنگ بداتەوە،
بەڵكو دەبێ پەروەردەو خوێندن گەورەترین پاڵپشتی سەقامگیری و ئارامی و ئاسودەیی خەڵكی
كوردستان بن..
جارێكی تر هیوادارم لە دڵسۆزی پەیامەكەم بگەیت و بە خەمخۆری
و لێبڕان و گرنگییەوە هەوڵی چارەسەری كێشەكان بدەیت، تا ئەگەر تروسكایی ئومێدێك هەبێت
نەكوژێتەوەو بە گەشبوونەوەی هیواكان لەم دەرفەتە كەم و خێرادا پەروەردە پێ بنێتە قۆناغێكی
نوێی دڵخۆشكەرەوە..
لەگەڵ رێزمدا...
فەهمی حەمە تۆفیق
بەرپرسی ئەنجومەنی باڵای مامۆستایانی یەكگرتوو
جەژنی قوربان
13/9/2016
نوێترین نوسینەکانی فەهمی حەمە تۆفیق