ئایا کورد سنوری خێڵی تێپەڕاندووە؟

وتار/ 27/10/2017 1305 جار بینراوە

ئارام مەجید عەلی

ئایا کورد سنوری خێڵی تێپەڕاندووە؟
ئارام مەجید عەلی
ئەگەر زیادەڕۆیی نەبێت و زۆر لەڕاستی دوور نەکەوینەوە، بەخوێندنەوەمان بۆ مێژووی کورد دەکرێت بڵێین لەوەتەی خودا کوردی دروست کردووە، کورد بەشێوەی خێڵگەری ژیاوەو هێشتا عەقڵیەتی خێڵی تێنەپەڕاندووە،دەکرێت بوترێت کورد و خێڵگەری دوو ڕووی یەک دراون.
کاتێک مێژووی نەتەوەکانی دیکە دەخوێنیتەوە ئەوەت بەرچاو دەکەوێت کەئەوانیش وەک ئێمەی کورد لەچەند خێڵێک پێکهاتوون و ماوەیەکیش وەک ئێمەی کورد سنوری خێڵیان تێنەپەڕاندووە، بەڵام بەتێپەڕبوونی کات بەتێگەشتن لەمێژوویان زۆر بەخێرایی ئەوسنورەیان تێپەڕاند و لەئاست دەوڵەتێکی سیاسی و دیموکراسی و سەروەری یاساو دامودەزگای پەرلەمانی دەستوری خۆیان بینیەوە.
بەڵام ئێمەی کورد و کۆنەستی تاکی کورد و کەلتوری کورد دەرهاویشتەی سیستەمی کەلتوری خێڵەکیە، هەموو میرو میرنشین و شۆڕشەکانی مێژوومان خێڵەکی بوون و خێڵەکان ئارستەیان کردوون،تەنانەت بزووتنەوەی ڕزگاریخوازی کورد لەو کەلتورەوە سەرچاوەیان گرتووە،کەلتورێک کەهەمیشە پڕبووە لەململانێی ناوخۆیی نامۆ بەیەکگرتن و سروشتی خێڵگەری جیاخوازی، کەزۆرجار بەرژەوەندی تاک ،خێڵ ،ناوچە،بنەماڵە، ڕێگربووە لەبەردەم یەکێتی نەتەوەیی.
هەر ئەمەش وایکردووە کورد هەمیشە لەدەرەوەی بازنەی مێژوو بێت و وەک نەتەوەیەکی بێ مێژوو یان مێژوو شێواو بناسرێت،لەڕاستیدا دەشێت بوترێت کورد تاکە نەتەوەی سەر زەوییە قۆناغەکانی مێژووی بەدوای یەکدا نەبڕیوە، چونکە هەر خێڵ و بنەماڵەیەک دوور لەیەک و دژبەیەک هەنگاویان هاویشتووە،ئەمەش ڕەنگدانەوەی خراپی بەسەر مێژوومانەوە هەبووە.

کورد ئەو نەتەوەیەی لەهەزارەی سێیەدایە هێشتا نەیتوانیو سنوری خێڵ تێپەڕێنێت و بەرەو دەوڵەتی یاساو دامەزراوەیی یاسایی هنگاوبنێت، تائێستاش لەسنوری خڵگەری دەژی و ناتوێنێت بێ دابڕان لەخێڵ یەک هانگاو بنێت، لەبردوودا مێژوو ئەم شاهیدیەمان بۆ دەدات و لەئێستاشدا لەتەواوی کایەی سیاسی و ئابوری و سەربازی  و حیزبی هەمان کەلتوری پێشوودا دەژین،
ئێستاش خێڵ بڕیار دەدات و خێڵ بیردەکاتەوە و خێڵگەرایی دەژین، لەڕاستیدا ئەمەش لەمێژوودا گاورەترین ڕێگربووە لەپێکەوەیی و یەکێتی و یەک ڕیزی و بنیاتنانی دەوڵەتی کوردی، چونکە وەک کورد دەڵێت هەرکەسەو بەبای خێڵی خۆی شەنی کردووە، ئەمەش ڕێخۆشکەربووە بۆ دووبەرەکی و خۆخۆری و ماڵوێرانی و ململانێی خێڵگەری و شەڕی ناوخۆو دامەزراندنی سیستەمی خێڵگەری و بنیاتنانی خیزبی بنەماڵەیی و خێڵەکی، هەموو ئەمەش لەخزمەت دوژمن و دژی خواستی خۆمان بووە.
هەر بەهۆی تێنەپەڕاندنی سنوری خێڵگەریەوە کورد نەیتوانیوە تەندروست بژی و تەندروس بیربکاتەوە و دواجار تاکێکی تەندروست بەرهەم بهێنێت، هەر بەهۆی ئەمەشەوە قۆناغەکانی پەرەسەندنی کۆمەڵگای کوردی بەدرێژایی مێژوو بەخاوی هەنگاوی ناوە،چونکە لەسیستەمی خێڵگەریدا پەرەسەندنی کۆمەڵایەتی و ئابوری و سیاسی و سەربازی و فەرهەنگی پەرەسەندنێکی ناسروشتیەو هەرئەمەش وایکردووە سەرجەم گۆڕانکاریەکان ناکامڵبن و هیچ قۆناغێکی کورد تەواوکەری قۆناغەکەی پێش خۆی نیە،واتە هیچ ڕووداوێک نیە لەمێژوومان تەواوکەری ڕووداوەکەی پێش خۆی بێت.
بەهۆی تێنەپەڕاندنی سنوری خێڵگەریەوە تا ئێستاش کورد نەیتوانیوە خۆی بێت و وەک کورد بیربکاتەوە و خاوەن بڕیاری سیاسی و چارەنوسسازی خۆی بێت،هەمیشە چاوی لەدەستی دەروەی خۆی بووە کەئاراستەیان بکات بادژی خۆیشی بێت، هەر ئامەش وایکرد بڵێین لەوەتەی مێژوو هەیە تا چارەکی یەکەمی سەدەی بیست و یەک کورد و خێڵگەری بەیەک ئاراستەو پێکەوەو ئاوێزان بەیەک هەنگاو دەنێن،واتە هێشتا کورد سنوری خێڵگەری تێ نەپەڕاندووە،ئەمەش کاریگەری بەسەر تەواوی کایەی کۆمەڵگەی کوردی هەبووەو هەیەو بەردەوامیش دەبێت.

نوێترین نوسینەکانی ئارام مەجید عەلی